Грузија – Винска земја со 8.000 берби

Рамази Инаишвили е сомелиер и вински консултант со грузиско потекло, со долгогодишно искуство во винската индустрија, развојот на вински брендови, маркетингот и меѓународната промоција на виното.

Роден во Грузија, од 1987 година живее во Србија, каде што има значаен придонес во развојот на современата винска сцена. Тој е еден од основачите на винаријата Chichateau, а како дел од раководниот тим на винаријата Erdevik учествувал во нејзиниот развој, меѓународна афирмација и пласман на вина на странските пазари.

Неговото професионално искуство ги опфаќа и организацијата на вински манифестации, меѓу кои е Vinski park во Сремска Митровица, како и развојот на нови вински проекти. Во 2025 година му се придружува на тимот на винаријата Veritas во Сремски Карловци.

За својот придонес во винската индустрија, специјализираниот портал Vino.rs го прогласи за „Винска личност на годината“ за 2023 година.

На Vinodonia Masters 2026, Рамази ќе ја претстави богатата винска традиција на својата родна Грузија, земјата што се смета за колевка на виното, водејќи ги посетителите низ нејзините вински региони, автохтони сорти и препознатливи вински стилови.

Кристина Анѓелкова е македонски енолог и дел од тимот на Paragon Urban Winery, со професионално искуство во производството на вино и примената на традиционални и современи енолошки техники.

Потекнува од Неготино, во срцето на винскиот регион Тиквеш, каде што уште од детството ја развива својата љубов кон лозарството и винарството. Своето образование го стекнува на Универзитетот за прехранбени технологии во Пловдив, Бугарија, каде што студира технологија на вино и пиво.

Како енолог во Paragon Urban Winery, Кристина е дел од тимот што придонесува за обновувањето и развојот на винаријата, со посебен акцент на квалитетот, сортниот карактер и индивидуалноста на вината. Нејзиниот професионален пристап се темели на спојот на традицијата и современите вински технологии, постојаното усовршување и почитувањето на природните карактеристики на грозјето.

Во рамките на Vinodonia Masters 2026, Кристина ќе го сподели своето практично искуство со употребата на квеври – традиционалните грузиски глинени садови, кои наоѓаат примена и во производството на македонски вина.