VRANEC TERROIR

М-р Сандра Георгиевска е главен енолог во винарија Камник, со повеќе од 15 години искуство во винопроизводството. Дел од тимот на „Камник“ е од 2010 година, а од 2018 година ја извршува функцијата главен енолог.

Дипломирала на Факултетот за земјоделски науки и храна во Скопје, каде што ги продолжила и постдипломските студии по енологија. Своето професионално искуство го надградувала и во Нов Зеланд, каде што учествувала во винска берба и производствен процес.

Покрај својата работа како главен енолог, Сандра има завршено и дополнителна сомелиерска едукација и учествува како оценувач на меѓународни вински натпревари.

Посебно внимание посветува на влијанието на тероарот, карактерот на сортата и потенцијалот за зреење на вината. Нејзиното долгогодишно искуство со вранецот и различните берби на „Камник“ ќе биде во фокусот на дегустацијата VRANÆC TERROIR.

Јане Неданоски е искусен сомелиер и професионалец во винската и угостителската индустрија, со повеќе од 15 години меѓународно искуство стекнато во Македонија, Катар и Обединетите Арапски Емирати.

Во текот на својата кариера работел во престижни ресторани во Доха и Дубаи, меѓу кои и Table 9, каде што бил сомелиер и менаџер. Соработувал со меѓународно признати готвачи и угостителски професионалци, а своето винско образование го надградувал и преку Wine & Spirit Education Trust (WSET).

Како дел од тимот на винарија Камник, Јане е посветен на презентацијата на вината, винската едукација и откривањето на нивниот карактер преку дегустација.

На Vinodonia Masters веќе има водено вертикални дегустации на архивски берби од „Камник“, претставувајќи го влијанието на времето, климатските услови и зреењето врз развојот на виното.

На работилницата VRANÆC TERROIR, заедно со енологот Сандра Георгиевска, ќе ги поведе учесниците низ различни берби на вранецот од микролокацијата Војница.